تاند( شنبه، د جوزا ۲۸ مه) د افغانستان له مختلفو سيمو څخه ترلاسه شوي خبرونه څرګندوي، چې په پنجشېر کې د طالبانو د استخباراتو د ځانګړو عملياتو د مسوول قاري انس په ګډون ۵ تنه وژل شوي او ۱۳ نور ټپيان دي.
سرچینې وايي، چې قاري انس د طالبانو د استخباراتو د عمومي رییس عبدالحق وثیق له نیږدې کسانو څخه و او په پنجشېر، کاپیسا، بغلان بدخشان، بلخ، ننگرهار، کونړ او خوست کې یې د طالبانو عمليات سمبالول.
له کندهار څخه په یوه خبر کې راغلي، چې په میوند ولسوالۍ کې وسلهوالو د یوې کورنۍ دوه مېرمنې او یو نارینه غړي وژلي او يو بل تن ېې ټپي کړی دی.
د دغې پېښې انګیزه تر اوسه نه ده روښانه شوې.
له هلمند څخه ځايي سرچینې وايي، چې په دغه ولایت کې د څو جلا ترافیکي پېښو له کبله یو کس مړ او ۱۲ نور ټپيان شوي دي.
د هلمند د اطلاعاتو او کلتور ریاست مرستیال مولوي محمدقاسم ریاض ويلي، چې دا پیښې د دغه ولایت په نادعلي، مارجه، باباجي او واشېر ولسوالیو کې ترافیکي پېښې شوې دي.