تاند( شنبه، د جوزا ۲۸ مه) د کندوز لپاره د طالبانو چارواکو ویلي، چې دغه ولايت به د افغان، پاکستاني او ایراني پهلوانانو د غېږ نيونې د سیالیو کوربه وي.
د طالبانو په یوه مطبوعاتي يادښت کې راغلي، چې په دې سیالیو کې د ګډون لپاره د ایران پهلوانان دغه ولايت ته رسیدلي دي.
د کندوز لپاره د طالبانو والي ملا نثار احمد نصرت ایراني ورزشکارانو ته ډاډ ورکړی، چې د افغانستان دروازې د هغو ګاونډیانو او نړۍ والو پر مخ خلاصې دي چې په قانوني توګه دغه هېواد ته تګ راتګ کوي او د دوی د امنیت تامینول یې خپل مسوولیت وباله.
د دغو سياليو په اړه طالبانو نور جزییات نه دي وړاندې کړي.
د یو بل خبر له مخې، د جوزجان ولايت په مرکز شبرغان کې پرون د سلګونه نندارچیانو په ګډون د پهلوانۍ سیمه ییزې سیالۍ ترسره شوي دي.
د جوزجان د پهلوانۍ د فدراسيون رييس محمد طاهر پهلوان ویلي، چې په بخدي پارک کې د دغو سياليو پر مهال ګڼو پهلوانانو لوبې سره وکړې او د خلکو له لوري وستايل شول.