تاند( شنبه، د جوزا ۲۸ مه) د سره صليب نړيوالې ټولنې په افغانستان کې د فقر له شدت سره د زرګونه تازه دمه سوالګرو د پیدا کیدو خبر ورکړ.
دغې ټولنې په یوه اعلامیه کې ویلي، چې دغه نوي سوالګر لارو کوڅو ته راوتلي او د یوې مړۍ ډوډۍ د تر لاسه کولو لپاره خیر غواړي.
سرچينه زياتوي، چې افغانستان کې ۷۰ سلنه وګړي د لومړنيو اړتياوو د پوره کولو وس نه لري.
دا په داسې حال کې ده، چې د طالبانو له لوري د افغاني سرې مياشتې لپاره ټاکل شوی رییس مولوي مطيع الحق خالص جینوا ته په یوه سفر تللی.
طالبانو ویلي، چې نوموړي د شاوخوا ۲۰ هېوادونو له استازو سره په افغانستان کې د بشري وضعيت په اړه خبرې کړي او د مرستو غوښتنه ېې کړې ده.
دا په داسې حال کې ده، چې طالبانو مخکې په افغانستان کې د بشري وضعيت اړوند راپورونه بې ځايه تبلیغات ګڼل.
د طالبانو کابینې څه موده مخکې په کابل ښار کې د سوالګرو د بایو میټریک او د سرې مياشتې له لوري ورسره د مرستو د پلان خبر ورکړی و، خو تر اوسه په دې برخه کې د عملي اقداماتو خبر نه دی ورکړل شوی.
د ملګرو ملتونو د ارقامو له مخې، د افغانستان شاوخوا ۲۵ میلیونه وګړي کافي خوړو ته لاسرسی نه لري او څو میلیونه نور د لوږې له کبله د مرګ ګواښ سره مخامخ دي.