تاند( شنبه، د جوزا ۲۸ مه) طالب چارواکو څو دقیقې مخکې (د کابل په وخت پاو کم دولس بجې) اعلان وکړ ، چې کابل کې د هندو باورو پر درمسال برید د بریدګرو په له منځه وړولو سره پای ته ورسېد.
د طالبانو تر کنټرول لاندې باختر خبري اژانس ليکلي، چې د طالبانو امنيتي ځواکونه وتوانېدل چې په بېړه د بريد د مهارولو لپاره لاس په کار شي او په لږ وخت کې بريدګر له منځه يوسي.
سرچينه زياتوي: په یاد برید کې دوه تنو خپل ژوند له لاسه ورکړی، ۷ ټپیان شوي او یو طالب سرتېری وژل شوی دی.
خپلواکو سرچینو د مرګ ژوبلې دغه ارقام نه دي تاييد کړي.
د کابل ښار د کارته پروان په سیمه کې نن سهار له شاوخوا ۷ بجو څخه د چاودنو او بریدونو لړۍ پیل شوې وه.
په خواله رسنیو کې چې کومې ویډیوګانې خپرې شوې دي، د اور لمبې ښکارې چې له درمساله بهر کیږي؛ د درمسال مخې ته هندوان او سیکان دریدلي دي او وایي چې وسله وال درمسال ته ننوتي دي.
د درمسال یوه مسوول ګورمان سینګ رویټرز اژانس ته ویلي دي چې د برید پرمهال دیرش تنه په درمسال کې دننه وو او اوس نه پوهیږي چې څو تنه به یې ژوندي پاتې شوې وي.
د دغه برید مسؤولیت کومې ډلې پر غاړه نه دی اخیستی، خو طالبانو د « باغیانو» کار بللی.