تاند( پنج شنبه، د جوزا ۲۶ مه) د کابل ولايت لپاره د طالبانو امنیه قومندان ولي جان (حمزه) خپلو منسوبینو ته د نوي یونیفورم د کارولو امر کړی.
هغه په یوه امنیتي غونډه کې ويلي، چې د مشرانو له خوا يې ټاکل شوی یونیفورم باید له وېشلو وروسته په جدي توګه تطبیق شي.
د طالبانو امنیه قوماندان ویلي دي: « هېڅ پولیس نور حق نه لري چې د یونیفورم د وېش لړۍ له بشپړېدو وروسته، د پولیسو په «چک پاینټ» کې په شخصي جامو کې ودرېږي.»
د طالبانو کورنیو چارو وزارت تېره اوونۍ، خپلو پولیسو ته د نوي یونیفورم د وېش لړۍ په رسمي ډول پیل کړه.
طالب چارواکو ويلي، ټاکل شوې ده دا لړۍ لومړی د کابل او کندهار او وروسته د هېواد په نورو ولایتونو کې پيل شي.
د کابل لپاره د طالبانو د امنیه قومندان تازه څرګندونې د خلکو هرکلي سره مخامخ شوي دي.
دوی د دغو خبرو په عملي کیدو ټینګار کړی او خلکو ته ېې د تطبيق په صورت کې پایلې ګټورې ګڼلي دي.