تاند(شنبه، د جوزا ۱۴ مه) د طالبانو د واکمنۍ له نړيوالې انزوا سره- سره د افغانستان د بیارغونې صندوق او نړیوال بانک د ۷۹۳ میلیونه ډالرو په ارزښت افغانستان ته درې پروژې منظورې کړې.
د دغو پروژو په اړه خپاره شوي معلومات څرګندوي، چې د دغو پروژو تطبيق افغانانو ته د خوراکي او د ژوندانه او بېړنیو روغتیایي خدمتونو په برخه کې اسانتیاوې برابروي.
نړیوال بانک وايي، دا پروژې به د طالبانو له واکه بهر د ملګرو ملتونو د ادارو او نادولتي موسسو له لارې تطبيق شي.
دا پروژې له مېرمنو او نجونو سره د مرستې، کروندګرو ته د کرنيزو فصلونو د پیاوړتیا او عامو خلکو ته د بېړنيو روغتیايي خدمتونو د برابرولو په موخه ډیزاین شوي دي.
سرچینې وايي، چې دا پروژې به د «کلیو پراختیایي شوراګانو» له لارې چې له ۱۸ کلونو راهیسې خلکو ته خدمات وړاندې کوي، له لاندې څخه په بره خوا پلې شي.
د طالبانو حکومت د دغو پروژو په اړه څه نه دي ويلي.
نړيواله ټولنه، بلکې هيڅ هېواد تر اوسه د دوی حکومت په رسمیت نه دی پېژندلی، چې له کبله ېې افغانستان سره په ګڼو برخو کې نړيوالې مرستې ودرول شوي او د روغتيايي خدمتونو په ګډون په مختلفو خدماتي او لومړنيو برخو کې جدي ستونزې رامنځته شوي دي.