تاند(چار شنبه، د جوزا ۱۱ مه) اروپايي ټولنه وايي، چې له منځنۍ اسیا سره په ګډه د افغانستان په اړه د مشترکې پالېسۍ په جوړولو کار کوي.
په دې اړه پرون د افغانستان لپاره د اروپايي ټولنې استازو او د منځنۍ اسیا د هېوادونو چارواکو د قزاقستان په مرکز الماتا ښار کې غونډه کړې.
په دې غونډه کې د افغانستان د هر اړخیز وضعیت او په دې اړه یوې ګډې تګلارې ته د رسېدو په اړه بحثونه شوي دي.
د افغانستان لپاره د اروپايي ټولنې ځانګړي استازي توماس نېکلاسون پر خپله ټوېټرپاڼه لیکلي، چې دوی په دې غونډه کې د افغاستان د اقتصاد، د نجونو د تعلیم او کار ته د مېرمنو پر بېرته ورستنېد خبرې کړې دي.
اروپايي ټولنې مخکې په ازبکستان کې، افغانستان ته د بشري مرستو د لېږد په اړه د يوه مرکز د جوړولو خبر هم ورکړی و.
په افغانستان کې د جمهوري نظام له سقوط څخه وروسته د افغانستان ګاونډي هېوادونه د نړيوالو ډېره پاملرنه جلب کړې ده.