تاند(چهارشنبه، د جوزا ۱۶ مه) د جرمني د بهرنیو چارو وزارت د سې شنبې په ورځ وویل چې دا هیواد هره اووني ۲۰۰ افغانان له نورو هیوادونو خپلې خاورې ته راولي.
انفومایګرینټس د (Funke Media Group) ورځپاڼې پر اساس وویل، هره اوونۍ شاوخوا ۲۰۰ تنه افغانان یوازې له پاکستان څخه جرمني ته راوړل کېږي.
دې ورځپاڼې د جرمني د بهرنیو چارو وزارت پر اساس ویلي، ډېر شمېر افغانان ایران ته هم اوړي او دوی یې جرمني ته لېږدوي.
د سره صلیب د نړیوالې کمېټې ريیس ویلي چې په افغانستان کې د ځپونکو شرایطو او بد اقتصادي وضعیت له کبله ډېر افغانان غواړي چې له خپل هیواده ووځي.
د انفو مایګرینټ د راپور له مخې، د روان میلادي کال په پیل کې ۵ زره هغو افغانانو ته چې پاسپورټونه یې نه لرل او د مځکې له لارې له افغانستانه وتلي وو، جرمني ته راوستل شوي د ي.
د طالبانو له واک ته رسېدو وروسته د جرمني د حکومت له لوري د افغانانو د ایستلو پر هڅو نیوکې شوي دي.
د اپریل په لومړیو کې د جرمني حکومت ومنله چې یو شمېر افغانان، چې ټاکل شوې وه د الوتکې په وسیله له افغانستانه وایستل شي، تر ایستل کېدو مخکې وژل شوي دي. دا هغه کسان وو چې جرمن ځواکونو ته یې کار کړی او د طالبانو له واک ته رسېدو وروسته ورته ویل شوي وو چې جرمني ته به بېول کېږي.
جرمني په ۹ میاشتو کې ۱۸ زره ویزې ورکړي
د جرمني د بهرنیو چارو وزارت تېره اوونۍ د ایستل شویو کارکوونکو او نورو له خطر سره مخامخ افغانانو د ایستلو په باب د انفومایګرینټ ځینو پوښتنو ته له یوې میاشتې وروسته ځواب ووایه.
د جرمني د باندنیو چارو وزارت د ویندوی په وینا، د هغو افغانانو په منځ کې چې د جرمني حکومت خپلې خاورې ته د هغو د راتګ په اړه اجازه ورکړې وه، په درو کې تر دوو زیات تراوسه توانېدلي چې جرمني ته راشي.
د دغه وزارت پر اساس، د ۲۰۲۱ د اګست له ۱۵ وروسته، له کله چې طالبان واک ته رسېدلي، په تېرو ۹ میاشتو کې، د جرمني د وېزې څانګې ټولټال ۱۸۵۰۰ افغانانو ته وېزې صادرې کړي دي.
د دغه وزارت ویندوی زیاته کړه، ډېر شمېر افغانان له خپل هیواده بې له دې چې څوک یې ملاتړ وکړي، وتلي دي. خو لا هم زرګونه نور افغانان د جرمني وېزې ته انتظار باسي.