تاند(جمعه، د جوزا ۶ مه) د هندوستان د ملي امنیت شورا سلاکار اجیت دوال په افغانستان کې د ترهګرو ډلو د فعاليتونو په دوام اندیښنه څرګنده کړې ده.
نوموړي له خپل ایراني سیال علي شمخاني سره د تاجيکستان په پلازمېنه دوشنبه کې د لیدنې پر مهال ویلي:« په افغانستان کې د قومي او مذهبي استازو په ګډون د پراخ بنسټه حکومت نه جوړېدل لویه ننګونه ګڼل کېږي.»
دوال زیاتوي، چې لا هم د هند ملي امنیت ته ګواښوونکې ډلې په افغانستان کې په ازاده فعالیت کوي.
د ده په وينا، د افغانستان اوسنيو حالاتو کې مسوولیت منل چې د یوه دولت د فعالیت لپاره لومړنی شرط دی، لا هم په دغه هېواد کې کمزوری ښکاري.
دوال د افغان بېځایه شويو او کډوالو مساله مهمه وبلله او په دې برخه کې یې د ګاونډیو د پاملرنې غوښتنه وکړه.
هغه زیاته کړې، چې افغانان په ناوړه حالت کې ژوند کوي او نړیواله ټولنه دې په بېړنۍ توګه د خوراکي او درملو مرسته ورسره وکړي.
د هند د ملي امنیت شورا سلاکار دغه راز وایي، چې له امریکا څخه پاتې ځينې وسلې د ترهګرو لاس ته لوېدلې او دا ګاونډیو هېوادونو ته یو ګواښ دی.
د ایران د ملي امنیت سلاکار علي شمخاني بيا په افغانستان کې د ټول ګډونه حکومت د جوړیدو له غوښتنې په ملاتړ سره ویلي، چې د سیمې هېوادونه دې په پرله پسې توګه د افغانستان پر وضعیت خبرې اترې وکړي.
د يادونې وړ ده، چې د تاجيکستان پلازمېنه پرون د افغانستان په اړه د سیمې د يو شمېر هېوادونو د لوړپوړو استازو د غونډې کوربه و.
د طالبانو واکمنۍ په نا مستقيمه توګه په تاجيکستان کې د افغانستان په اړه ترسره شوې پرونۍ غونډې ته منفي غبرګون ښودلی او ځينې سيمه ييز هېوادونه يې القاعدې او داعش ډلې ته په کمپاين تورن کړي دي.
د طالبانو تر کنټرول لاندې باختر خبري اژانس د تاجيکستان په کوربه توب د پرونۍ غونډې په غبرګون کې ويلي، چې داسې غونډې سمبوليکه او تبليغاتي بڼه لري.