تاند(چار شنبه، د جوزا ۴ مه) د امريکا متحده ايالاتو ولسمشر جوبایډن او د جاپان، اسټراليا او هندوستان صدراعظمانو په ګډه د افغانستان په اړه د ملګرو ملتونو سازمان د امنیت شورا د وروستي پریکړه لیک د عملي کیدو غوښتنه کړې ده.
دا پریکړه لیک په ۲۰۲۱ کې صادر شوی او ۲۵۲۹ ګڼه باندې ياديږي.
ياد شوی پريکړه ليک ټینګار کوي، چې د افغانستان خاوره نه بايد د هیڅ کومې ترهګرې ډلې له لوري د چا خلاف استعمال او هم ورڅخه د ترهګرو ډلو د روزنې او مالي تمويل لپاره ګټه وانخيستل شي.
د يادو هېوادونو مشرانو پرون د دغه پریکړه لیک د عملي کیدو غوښتنه د جاپان په پلازمېنه توکیو کې د لیدنې پر مهال کړې ده.
دغو نړيوالو مشرانو په داسې حال کې د دغه پریکړه لیک د عملي کیدو غوښتنه کړې، چې د طالبانو له واک لاندې افغانستان څخه د ترهګرو ډلو د بیا فعالیدو ادعاوې زياتې شوي دي.
په وروستيو کې داعش ډلې د افغانستان له خاورې د ازبکستان او تاجيکستان خلاف د بریدونو ادعاوې کړي دي.
سربېره پر دې پر طالبانو د بشري حقونو د نقض تورونه هم زیات شوي.
د ملګرو ملتونو په یاد شوي پريکړه ليک کې ټينګار شوی و، چې طالبان بايد د ټولو افغانانو اساسي او بشري حقونو ته درناوی وکړي او هغو خلکو ته، چې غواړي له افغانستان څخه ووځي، د وتو اجازه ورکړي.
طالبانو بیا په افغانستان کې د ترهګرو ډلو د بيا فعالیدو او دغه راز د بشري حقونو د نقض ادعاوې رد کړي دي.