دوشنبه, جون 24, 2024
Homeخبرونهط- انو په دویم ځل د عزيز الله کاروان قبر په بمونو...

ط- انو په دویم ځل د عزيز الله کاروان قبر په بمونو الوزولی

تاند(سې شنبه، د جوزا ۳) د پکتيکا ځايي خلکو ويلي، چې طالبانو په دې ولايت کې د جمهوري نظام د ځانګړو ځواکونو د يوه مشهور قومندان عزيز الله کاروان قبر په دویم ځل په بمونو الوزولی دی.

د پکتیکا مشهور شاعر بشير باران پرته له دې، چې په مشخص ډول په دې اړه څه ووايي د خپل فیسبوک پر پروفایل او کور د عزيز الله کاروان عکسونه لګولي او دا دوه جملې یې ورسره لیکلي دي:(( – لکه چې ته ژوندی یې مونږه درته مړه ولاړ یوو…— – د مېړنیو ووړکو نه وي زیارتونه…))

طالبانو د ۱۴۰۰ کال په عقرب میاشت کې هم د نوموړي قبر په بمونو الوزولی و.

عزيز الله کاروان په پکتیکا کې د طالبانو په خلاف د عملياتو مشري کوله او په دې برخه کې ېې ډېرې لاسته راوړنې لرلې.

نوموړی څو کاله مخکې د کابل په درېیم مکرويان سیمه کې د طالبانو له لوري ووژل شو.

د عزيز الله کاروان د قبر الوزولو په غبرګون کې یو شمېر فعالانو توند غبرګونونه ښودلي او ويلي، چې طالب نه يوازې د پښتني او انساني، بلکې اسلامي ارزښتونو خلاف عملونه هم کوي.

منتقدینو په کندهار کې د جنرال رازق، پکتیکا کې د عزیز الله کاروان د قبرونو او په نورو سیمو کې د غازي امان الله خان، اشرف غني، حامد کرزي او نورو پښتنو شخصیتونو عکسونو او نومونو ته د سپکاوي په يادولو ويلي، چې دا ډله د يوې افراطي ایډیولوژۍ استازیتوب کوي او د ځینو فاشيستانو د تبلیغاتو برعکس چې طالبان د پښتنو استازي او مدافعین ګڼي، هيڅکله د پښتنو د روايتونو او پرګنو استازي نه دي.

LEAVE A REPLY

Please enter your comment!
Please enter your name here

- Advertisment -

ادب