تاند(چار شنبه، د ثور ۲۸ مه) ځايي سرچينې وايي، چې د ننګرهار ولايت په مرکز جلال اباد ښار کې نن د ناڅرګندو وسله والو په ډزو ۳ طالبان وژل شوي.
د سرچينو د معلوماتو په اساس، دغه طالبان د جلال اباد ښار په چپرهار اډه کې نن سهار وژل شوي او وسلې یې وړل شوي.
د طالبانو ځايي چارواکو په دې اړه څه نه دي ويلي.
د افغانستان د ازادۍ د ملي اسلامي تحریک په نوم يوه ډله، چې د جنرال عبدالمتین سلېمانخېل په مشرۍ د طالبانو خلاف د فعالیت او د جمهوري نظام د يوه برخه کومانډو ځواکونو د انسجام ادعا لري، وايي چې د چپرهار ولسوالۍ په کنډي خېل سیمه کې يې د طالبانو په يوې پوستې برید کړی او د ۸ طالبانو د وژلو تر څنګ یې د هغوی وسلې او مهمات ورسره وړي دي.
معلومه نه ده، چې دواړه ادعا شوې پېښې يو او که سره جلا دي.
د طالبانو له بيا واکمنیدو سره په افغانستان کې د نا امنیو پيښو خبري پوښښ دقیقو اطلاعاتو ته د لږ لاسرسي له کبله ډير ستونزمن شوی.