تاند(سې شنبه، د ثور ۲۷ مه) هندي رسنیو ویلي، چې هېواد یې پرون د افغانستان د امنيتي وضعيت په اړه د یوې سیمه ییزې غونډې کوربه و.
ويل شوي، چې په دې غونډه کې د پاکستان په ګډون د شانګهای د سیمه ییزو همکاریو سازمان د ځینو نورو غړو هېوادونو د ترهګرۍ پر ضد د مبارزې کارپوهانو او استازو ګډون درلود.
دا غونډه هم د شانګهای سازمان تر چتر لاندې جوړه شوې او پکې په افغانستان کې د ترهګرو ډلو د فعاليتونو په اړه بحث او خبرې شوي دي.
په هندوستان کې د افغانستان د پرزول شوي جمهوري نظام سفیر فرید ماموندزي له هندوستان څخه د دې غونډې د کوربه توب له امله په یوه ټویټ کې مننه کړې ده.
نوموړي د طالبانو له واکمنیدو وروسته په افغانستان کې د امنیتي او انساني وضعیت د لا خرابېدو خبر ورکړی او هيله مندي یې ښودلې، چې وروستۍ غونډه به د افغانستان وضعیت ته ګټوره وي.
طالبانو دغې غونډې ته کوم غبرګون نه دی ښودلی، خو مخکې یې ټینګار کړی، چې د افغانستان له خاورې به ترهګرو ډلو ته د چا په خلاف د فعالیت اجازه نه ورکوي.