تاند(دوشنبه، د ثور ۲۶ مه) راپورونه وايي چې د پاکستان د پوځ او استخباراتو (آی ایس آی) د چارواکو یوه ډله د چهارشنبې له ورځې راهیسې په کابل کې ده چې د افغان طالبانو په منځګړتوب د پاکستاني طالبانو له تحریک یا ټي ټي پي سره جوړجاړی وکړي.
سرچینې وايي چې د پاکستان د استخباراتو پخوانی ريیس جنرال فیض حمید نن (دوشنبه) کابل ته ورسېد او په سرینا هوټل کې له نورو مرکچیانو سره ملګری شو.
تاند داسې راپورونه ترلاسه کړي چې د پاکستان پوځي چارواکو افغان طالبانو ته ویلي چې که پاکستاني طالبان یې دایمي اوربند او د جګړې بس کولو ته راضي کړای شول، د دوی حکومت به نه یوازې پاکستان په رسمیت وپېژني بلکې پاکستان به له خپل نفوذه په استفادې نور هم قانع کړي چې د طالبانو حکومت په رسمیت وپېژني. خو دا په داسې حال کې ده چې نه پاکستان د طالبانو حکومت په رسمیت پېژندلی شي او نه دا هیواد نور دې کار ته هڅولی شي ځکه چې د امریکا په شمول د نړۍ ستر قدرتونه لا نه غواړي چې د طالبانو حکومت په رسمیت وپېژندل شي.
سي این این نیوز ۱۸ ته نامعلومو سرچینو ویلي، چې افغان طالبان د هغو دوو پاکستاني طالب قوماندانانو د ورسپارلو غوښتنه کوي چې پاکستان نیولي دي.
د پاکستان پوځ په ۲۰۰۹ م کال د پاکستاني طالبانو دا دوه قوماندانان مسلم خان او محمود خان په سوات کې نیولي وو. ویل شوي چې دا دوه تنه اوس د طالبانو په حکومت کې د حقاني شبکې په توقیف کې د مېلمنو په توګه ساتل کېږي.
سی این این نیوز ۱۸ وايي چې د پاکستاني طالبانو او د پاکستان د پوځ او استخباراتو ترمنځ روانې خبرې د حقاني شبکې په ملاتړ او منځګړتوب کېږي.
سرچینې وايي چې د پاکستاني طالبانو د وزیرستان څانګه تراوسه پورې له روانې معاملې خوشاله نه ده.
د سرچینو پر اساس، د پاکستاني طالبانو یوه څانګه په دې خاطر جوړجاړي ته تیاره نه ده چې ممکن د دوی جوړجاړی د بلوڅو بیلتون غوښتونکو پر ضد وانګېرل شي.
د پاکستان بلوڅان له کلونو راهیسې د خپلو طبیعي سرچینو او خپلواکۍ لپاره مبارزه کوي. د بوګټي په شان ګڼ بلوڅ مشران او ځوانان وژل شوي او ډېر نور د قبایلي پښتنو په شان د پاکستان د پوځ له لوري تري تم شوي دي.