تاند:( يکشنبه، د ثور پینځه ویشتمه) د پخواني ولسمشر حامد کرزي د دفتر رييس عبدالکریم خرم په یوه پیغام کې طالبان په هېواد کې د نوې جګړې مخنيوي ته وبلل.
نوموړي په خپله ټويټر پاڼه کې ولیکل:« طالبانو ته، اسلامي امارت ته! د یوې نوې جگړې گټل کامیابي نده بلکې د یوې نوې جگړې د پیښېدو مخنیوی کامیابي ده، که حکومتداري کوئ.»
هغه په مشخص ډول نه دي ويلي، چې له نوې جګړې څخه یې موخه څه ده، خو په وروستيو کې د افغانستان له یو شمېر ولایتونو څخه د طالبانو په ضد د وسله والو فعالیتونو خبرونه ورکول کېږي.
طالبانو د دوی خلاف د جګړې ادعاوې رد کړي او د هغو کسانو په ځپلو یې ټینګار کړی، چې د دوی په خلاف جنګیږي.
له دې سره په ځینو راپورونو کې راغلي، چې د ملي امنيت د پخواني رييس رحمت الله نبیل په مشرۍ د طالبانو خلاف په یوې نوې جبهې کار روان دی.
تر دې مخکې د طالبانو خلاف د شاوخوا لسو جنګي جبهو د موجوديت ادعاوې شوي، خو د طالبانو پلويان د يادو جبهو او ډلو بحثونه تر ډېره تبليغاتي ګڼي.