پنجشنبه, مارچ 28, 2024
Homeخبرونهپه مختلفو پېښو کې د ۵ تنو د وژل کيدو خبر ورکړل...

په مختلفو پېښو کې د ۵ تنو د وژل کيدو خبر ورکړل شوی

تاند:( يکشنبه، د ثور پینځه ویشتمه) د افغانستان له مختلفو سيمو څخه د څو تر لاسه شویو خبرونو په اساس لږ تر لږه ۵ تنه وژل شوي دي.

په کابل کې ځایي سرچينو ويلي، چې د محمد هادي امیري ( مشهور په ببرک اميري) یو سوداګر په خیرخانې سیمه کې د طالبانو له لوري وژل شوی دی.

 د سرچينو په حواله، نوموړی د طالبانو په چیک پینټ کې وژل شوی.

طالبانو په دې اړه څه نه دي ويلي.

په بلخ کې بیا نا معلومو وسله والو د یوه ټکسي چلوونکي سر پرې کړی دی.

د ټکسي چلوونکي امان الله خپلوان وایي، امان الله چې د بلخ ولایت خلم ولسوالۍ له مرکز څخه د مزارشریف مرکزي روغتون ته د تګ په حال کې و، د پلټنې په تمځای کې د وسله والو کسانو له خوا درول شوی او وروسته یې په چاړې سر پرې شوی دی.

د امان الله د خپلوانو په وینا، وسله والو کسانو هغه د خپلې مېرمنې د سترګو پر وړاندې وژلی دی. دغه پېښه نهه ورځې مخکې شوې ده.

د امان الله د خپلوانو په وینا، دغه کس د خپلې کورنۍ یوازینی سرپرست و. له هغه ۴ ماشومان پاتې شوي دي.

طالبانو له دغې پېښې د ۹ ورځو په تېرېدو سره، تر اوسه د دې پېښې عاملان نه دي نیولي.

د فارياب ولايت په قرايي ولسوالۍکې بيا يوه کس د خپلې مېرمنې خور ( خینه) په ډزو وژلې او مړه کړې ده.

طالب چارواکو ویلي، چې دغه کس تښتیدلی، خو د نيولو هڅې یې روانې دي.

 د بغلان له اندراب پل حصار ولسوالۍ څخه بيا ادعا شوې، چې طالبانو یو ملکي وګړی په دغې ولسوالۍ کې وژلی دی.

سرچینو ویلي، چې طالبانو د ګل رحمن په نامه پنځه ورځې مخکې یو ملکي وګړی له ځان سره خپلې پوستې ته بیولی و او په دې یې شکنجه کاوه، چې د مقاومت ډلې د قومندانانو ادرسونه ورکړي.

سرچینې زیاتوي، طالبانو نوموړی تر پنځو ورځو ربړونې وروسته، پرون سهار ۴:۰۰ بجې د پل حصار ولسوالۍ په نوبهار چمن کې په مرمیو وویشته.

طالبان تېره اوونۍ هم په دغې ولسوالۍ کې ۷ کسان په ورته وژلو تورن شوي وو.

دغې ډلې د يادو پېښو په اړه څه نه دي ويلي.

له لوګر څخه بیا سیمه ییزې سرچینې وايي، چې د دغه ولایت د مرکز پل علم ښار په حصارک کلي کې ناپېژاندو وسله والو یو ځوان وژلی دی.

د سرچینو په وینا، دا ځوان د پکتیا اصلي اوسېدونکی و او له ۸ کالو راهیسې له خپلې کورنۍ سره د پل علم په حصارک کلي کې اوسېده.

د دغه قتل انګېزه شخصي دښمني بلل شوې ده.

طالبانو په دې اړه هم څه نه دي ويلي.

په وروستيو کې د افغانستان له مختلفو سيمو څخه د جنګي، هدفي او جنايي وژنو خبرونه زيات شوي دي.

LEAVE A REPLY

Please enter your comment!
Please enter your name here

- Advertisment -

ادب