تاند- د هند د اله اباد محکمې د تاج محل د ۲۲ بندو خونو د پرانیستلو په اړه اقامه شوې دعوه رد کړه.
د هندي رسنیو د راپور له مخې، د اله اباد له محکمې څخه غوښتل شوي و چې د تاریخي څېړنو لپاره د تاج محل د ۲۲ بندو خونو د پرانیستلو اجازه ورکړي خو محکمې د پنجشنبې په ورځ دا غوښتنه رد کړه.
دا خونې د هند د ارکیالوجیکي سروې د ادارې په کنټرول کې دي.
مغول پاچا شاه جهان تاج محل د خپلې ماندینې ممتاز له مړینې وروسته د هغې د قبر لپاره جوړ کړی و.
له همدې کبله د تاج محل ودانۍ مېرمنې ته د وفادارۍ او تلپاتې مینې یو سیمبول ګڼل کېږي.
په اګره کې د دې ودانۍ پر جوړولو، چې د نړۍ یو شهکار ګڼل کېږي، په ۱۶۳۲ م کال کې کار پیل شو او ۲۲ کاله وروسته په ۱۶۵۳ کې بشپړ شو.
د دې معماري شهکار په جوړولو کې د معمارانو، انځورګرانو، حکاکانو او نورو هنرمندانو په ګډون ۲۰ زره کارګرو برخه لرله.
تاج محل داسې جوړ شوی چې د ورځې یې څو ځلې رنګ بدلېږي. مثلا سهار یو ډول، مازیګر بل او د شپې له خوا بل رنګ پيدا کوي.