تاند:( دوشنبه، د ثور نولسمه) د طالبانو د واکمنۍ ځواکونو په بلخ کې د انسان تښتوونکو له منګولو یو تن آزاد کړ.
د بلخ لپاره د طالبانو د امنیت آمر قاري عبدالحى عابد وايي چې د طالبانو له واکمنېدو وروسته په دغه ولایت کې دیارلس تنه د انسان تښتوونکو له منګولو آزاد شوي او په تړاو یې ۶۰ تنه نیول شوي دي.
د یوه بل خبر له مخې: په بلخ کې د طالبانو د امنیې قوماندانۍ ویاند محمد آصف وزیري وايي چې په مزارشریف ښار کې څلور تنه د غلا په تور نیول شوي دي.
د هغه په خبره ، له نیول شویو کسانو څخه پنځه تومانچې، درې برچې، یوه کلاشینکوف او لاسي بم هم ترلاسه شوي دي.
بل لور ته: د طالبانو استخباراتو په هرات کې د يوه تښتول شوي ډاکټر د ژغورلو خبر ورکړی.
چارواکو ویلي، چې ياد شوی ډاکټر له پښتون زرغون ولسوالۍ څخه څه موده مخکې تښتول شوی او په ګذره ولسوالۍ کې ژغورل شوی دی.
د طالبانو له لوري په وروستيو ورځو کې د تښتول شویو کسانو د ژغورنې خبرونه زيات شوي.