تاند:( يکشنبه، د ثور يوولسمه) په داسې حال کې، چې طالب مشرانو ظاهرا خپل ځواکونه په اختر کې خلکو سره ښه چلند ته هڅولي، خو راپورونه ښیي چې لږ تر لږه د جمهوري نظام ۲ امنیتي افسران طالبانو په همدې اختر کې وژلي او ۱ بل ېې بندیان کړي دي.
په هرات کې د جمهوري نظام د ملي امنيت رياست د يوه ټولي د قومندان تورن محمد آصف سلطاني په اړه ويل شوي، چې د طالبانو په بلنه یې دنده هم بیرته پیل کړې وه او د دوی جنګیالي یې روزل، خو د دې سره- سره طالبانو وژلی دی.
په پکتيا کې د پخواني ملي امنيت د يوه کارکوونکي رحمت الله خپلوانو هم د نوموړي د وژل شوي جسد عکسونه رسنیز کړي او طالبان یې د دې کار عامل ګڼلي.
د رحمت الله د کورنۍ غړو ويلي، چې هغه د جمهوري نظام له سقوط څخه وروسته د طالبانو له لوري د « بښنې او تسلیمۍ» کارت هم تر لاسه کړی و او په نجارۍ بوخت و.
نوموړی د تېرې سې شنبې په شپه طالبانو د پکتیا امنیه قومندانۍ ته بیولی، چې اوس یې جسد تر لاسه شوی دی.
په ورته وخت کې له کابل څخه د پخواني پارلمان د امنیتي قطعې د قومندان صالح محمد کورنۍ ويلي، چې طالبانو هغه له کوره ويستی او نامعلوم لوري ته بیولی.
د صالح محمد کورنۍ تر اوسه له نوموړي سره اړيکې نه لري او په مرګ و ژوند یې نه دي خبر.
طالبانو د دغو پېښو په اړه څه نه دي ويلي.