تاند:( چارشنبه، د ثور اوومه) د بې واکه شوي ولسمشر محمد اشرف غني لومړي مرستيال امر الله صالح د طالبانو د تحریک د بنسټګر ملا محمد عمر مجاهد د مړینې د ادعا شوي عامل په اړه ځینې پوښتنې وړاندې کړي.
امر الله صالح نن په خپله فیسبوک پاڼه کې لیکلي، چې که ملا عمر ريښتيا د توبرکلوز يا سل ناروغۍ له کبله مړ شوی وي، نو د ناروغۍ له شدت سره یې له مړینې مخکې ولې ځانمرګی برید نه کاوه؟
صالح زیاتوي، چې د طالبانو مشران نور خلک ځانمرګو بریدونو ته هڅول، خو خپله یې حتا که توبرکلوز یا سل ناروغي هم لرله، د ځانمرګي برید لپاره واسکټ نه اغوسته.
پخواني مرستيال ولسمشر د طالبانو مشران د خلکو په غولولو تورن او ويلي، چې په ډېرو برخو کې دغه ډله له راولپنډۍ څخه رهبري کیږي.
هغه د افغانستان پر خاورې د پاکستان د وروستیو هوايي بمباریو په اړه د ملا عمر د زوی او د طالبانو د دفاع وزیر ملا یعقوب مجاهد غبرګون ته اشاره کوي او وايي، چې د پاکستان لخوا د سلګونو تنو له وژل کيدو وروسته هم طالب مشران حتا په ښکاره د پاکستان د نوم اخیستو جرئت نه لري.
د طالبانو د واکمنۍ وياند ذبيح الله مجاهد څو ورځې مخکې د دوی د بنسټګر او لومړني رهبر ملا محمد عمر مجاهد د مړینې په نهمه تلين غونډه کې وويل، چې ملا عمر په زابل کې د توبرکلوز یا سل له اوږدې ناروغۍ وروسته مړشوی و.
د افغانستان د ملي امنيت پخواني رييس رحمت الله نبیل بیا ویلي وو، چې ملا عمر په افغانستان کې نه، بلکې پاکستان کې د هغه هېواد د استخباراتو په امر د نوموړي د ورپسې ځای ناستي ملا اختر منصور له لوري په مرموز ډول وژل شوی دی.
طالبانو په دې اړه شویو پوښتنو او ادعاوو ته غبرګون نه دی ښودلی.
یاره پنجي ماما دآ خبره خو د ډیره احمقه او هیڅ سر سره نخوري ! اوس هغه دی تاسو انتحاری کوۍ یو یې هم دسړي زوی نه یاست !