تاند:(دوشنبه، د حمل لومړۍ- نوروز) ‏د افغانستان د پرزول شوي جمهوري نظام يوه مهم چارواکي غلام فاروق وردګ چې له هېواده بهر دی، د بيرته ستنيدو ضمني تمايل څرګند کړی دی.

پر ښاغلی وردګ، چې د حامد کرزي او اشرف غني په کابینو کې وزیر و، د مالي فساد ګڼ تورونه هم ور پورې دي.

نوموړي په يوه اعلاميه کې د طالبانو د کابینې له لوري د بهر مېشتو افغان شخصیتونو د ستنولو کميسيون د جوړيدو هرکلی کړی او ویلي:«‏هېواد ته د افغانانو د باعزته ستنېدو او له دوی سره د اسلامي امارت د اړیکو د کمیسیون ایجاد د زړه له تله ستایم او د دې ابتکار هرکلی کوم.»

فاروق وردګ زیاتوي:«په حقیقت کې سیاسي ثبات، د نظام ټینګښت، د هغه موثریت، افادیت، استمرار، ملي او جهاني مشروعیت د همداسې سالمو او معقولو کړنو مستلزم وي.»

فاروق وردګ د افغانستان په اړه په ۲۰۰۱ کې د بن غونډې ته د طالبانو او د حکمتیار د حزب اسلامي پر نه بللو نیوکه کړې او دا دوه ډلې یې د هېواد «دوه لوی منل شوي جهتونه» ګڼلي دي.

خو وردګ، چې خپله هم د جمهوري نظام او په خاص ډول د حامد کرزي د ۱۳ کلنې ولسمشرۍ یو له اصلي او پريکړه کوونکو چارواکو څخه و، په دې برخه کې د خپلې ناغيړۍ او ملامتۍ په اړه څه نه دي ويلي.

دا په داسې حال کې ده، چې فاروق وردګ شاوخوا ۱۰ کاله مخکې د بي بي سي فارسي ټلویزیون له «به عبارت دیګر» خپرونې سره په یوه مرکه کې طالبان د پاکستان د موخو لپاره جنګیدونکي جنګیالي ګڼلي وو.

دا مرکه په دې پته ياد شوي ټلويزيون تېر کال يو ځل بيا پر خپلې یوټیوب پاڼې خپره کړې وه:

فاروق وردګ په خپله تازه اعلامیه کې په ضمني ډول له طالبانو دا هم غوښتي چې د « خدمت ګزارۍ» زمینه ورته برابره کړي.

فاروق وردګ له نورو بهر مېشتو افغانانو هم غوښتي چې هېواد ته د ستنېدو لپاره د طالبانو بلنه ومني.

نوموړي له طالبانو دا هم غوښتي چې پر خپلو ژمنو ودریږي او د دولتدارۍ لمنه پراخه کړي.

د فاروق وردګ او د طالبانو د يو شمېر نورو ملاتړو سياسي څېرو دا څرګندونې په داسې حال کې دي، چې د طالبانو کابینې په یوه بله پریکړه کې لوی څارنوالۍ ته د پخوانيو په فساد تورنو چارواکو د دوسيو د څېړلو امر کړی.

ويل کيږي چې فاروق وردګ هم د افغانستان په پوهنې وزارت کې د دندې پر وخت د خیالي ښوونځیو د لرلو  او له دې درکه د سلګونه میلیون ډالرو په جېب ته وهلو تورن دی.

نوموړي نه دي ويلي چې د دغو دوسيو له بيا سپړلو سره موافق دی کنه؟