تاند:(يکشنبه، د حوت ۱۵ مه) ‏‏د اسلامي همکاریو سازمان وايي چې نن یې په کابل کې د بشري مرستو دفتر پرانيستی.

ياد شوي سازمان زياته کړې چې محمد سعید العیاش یې د دغه دفتر رييس ټاکلی.

د دغه دفتر د پرانيستلو موخه له افغانستان سره د اسلامي هېوادونو د بشري مرستو تنظيم ښودل شوی.

د دفتر د پرانيستلو پریکړه په اسلام اباد کې د افغانستان د بشري ناورين په اړه د اسلامي همکاریو سازمان په فوق العاده غونډه کې شوې وه.

معلومه نه ده، چې ياد شوی دفتر به د څومره امکاناتو په لرلو سره فعاليت کوي او موثریت به ېې تر کومه حده وي.

افغانان په ټوله کې د اسلامي هېوادونو له نقش څخه د بشري ناورين د مقابلې په برخه کې ډېر راضي نه بریښي.

د طالبانو د واکمنۍ چارواکو د یاد شوي دفتر د پرانيستلو په اړه څه نه دي ويلي.