تاند:(یکشنبه، د حوت ۱۵ مه) د طالبانو د حکومت چارواکي وايي چې امنيتي ځواکونو یې پرون (شنبې) په کندوز ولايت کې یوه ښځه له یوه شمېر وسلو او مهماتو سره نیولې ده.
د باختر آژانس د راپور له مخې، دې ښځې سره دوه تومانچې، يوه چانټه، درې شاجوره د کلاشينکوف مرمۍ، ۷ برچې، یوه اندازه نورې مختلفې مرمۍ، يو امريکايي دوربین، د کابل بانک ۱۰ کارتونه، يو شمېر سیمکارتونه او نور وسايل تر لاسه شوي دي.
طالبانو د دې ښځې د هويت او نورو جزيياتو په اړه څه نه دي ويلي.
په وروستيو کې طالبانو د ډېرو وسلو او مهماتو د نیولو خبر ورکړی دی.
د دوی له کور په کور تالاشيو څخه په یو شمېر ولایتونو کې خلکو هرکلی کړی او ویلي چې دا ډول عمليات د امنيت د ښه کیدو لپاره ګټور دي.