تاند: ( چار شنبه ، د دلوې اووه ویشتمه) د بریتانیا د بهرنیو چارو وزیرې لیز تراس وايي، چې هېواد به یې راتلونکې میلادي میاشت له افغانستان سره د ۴،۴ ميليارده ډالره بشري مرستو د ټولولو د یوه مهم کنفرانس کوربه وي.
د نوموړې په وينا، د دې مرستې د ټولولو لپاره به له مختلفو هېوادونو او نړیوالو بنسټونو څخه مرسته وغوښتل شي.
د يادې مرستې د ټولولو غږ څه موده مخکې د ملګرو ملتونو له لوري شوی و.
دا په داسې حال کې ده، چې تازه د طالبانو د عامې روغتيا وزارت د سرپرست په مشرۍ د دوی یو پلاوی د بريتانيا پلازمېنې لندن ته تللی، څو له افغانستان سره د بشري مرستو په اړه خبرې وکړي.
طالبانو د ياد شوي کنفرانس په اړه څه نه دي ويلي.
څه موده مخکې د بریتانیا ځانګړی استازی کابل ته راغلی او د طالبانو د بهرنيو چارو وزير مولوي امیر خان متقي سره په لیدنه کې ویلي وو، چې صدراعظم یې د طالبانو له حکومت سره د تعامل زیاتیدو لارښوونه ورته کړې ده.