تاند: ( شنبه ، د دلوې درويشتمه)‏ ‏د ولسمشر غني د دفتر پخوانی رييس او د جمهوري نظام لوړپوړی چارواکی عبدالسلام رحيمي نن بیرته کابل ته ستون او د طالبانو له تاوده هرکلي سره مخ شو.

 د طالبانو چارواکي وايي، چې له نوموړي څخه د دوی د بهرنیو چارو وزیر مولوي امیر خان متقي، د امربالمعروف و نهي عن المنکر وزير شيخ محمد خالد الحنفي او د مرکچي پلاوي غړي حافط انس حقاني د بهرنیو چارو وزارت کې هرکلی وکړ.

 د طالبانو د بهرنیو چارو وزیر هېواد ته د رحیمي په راتللو خوښي وښوده او په خپل وطن کې یې د باعزته ژوند کولو ډاډ ورکړ.

امیرخان متقي د هغو افغانانو د ژوند شرایطو په باب هم اندېښنه څرګنده کړه چې له هېواده بهر په کمپونو کې سخت ژوند تېروي او هیله یې څرګنده کړه چې وطن ته راوګرځي او په خپل وطن کې خوشاله ژوند ولري.

 متقي وویل، د نظر تفاوتونه یوه طبیعي چاره ده او دوی ورته احترام لري، خو دین او وطن د ټولو مشترک دی او د افغانستان خدمت د ټولو ګډه موخه ده.

طالبانو د عبدالسلام رحیمي په حواله ويلي، چې يې ويل: خوښ یم چې خپل هیواد ته راغلم او له نوي حکومت سره راغلی مثبت بدلون د ستایلو او مننې وړ دی.

ویل شوي، چې رحیمي د شته ننګونو او د طالبانو د چارواکو د هڅو و هاند په تړاو چارواکو ته د لا لوړې حوصلې او زغم غوښتنه وکړه او زیاته یې کړه چې د نوي حکومت په ډيرو کمو امکاناتو چارې روانې او ښې ساتلې دي.

 ښاغلي رحیمي وویل، دمګړۍ په کوردننه او بهر د پاموړ تهدیدونه او خنډونه وجود نه لري.

د يادونې وړ ده، چې عبدالسلام رحيمي د ولسمشر غني له واک ته رسېدو سره د هغه د دفتر لوی رییس او وروسته د سولې چارو وزير او د سولې په چارو کې د ولسمشر غني ځانګړی استازی و.

دا لومړی ځل دی، چې د ښاغلي غني یو نیږدې کس د طالبانو له واکمنیدو وروسته بیرته هېواد ته ستنیږي.