تاند: ( شنبه ، د دلوې درويشتمه) د طالبانو د کورنيو چارو وزارت د پخواني اجرائيه رياست د مرستيال انجنير محمد خان د کورنۍ غړو د وژل کيدو په اړه غبرګون ښودلی.
دغه وزارت په يوه اعلاميه کې پر دغې پېښې د خواشينۍ ښودلو ترڅنګ ويلي: د انجینر محمدخان په کور کې دننه د هغه د کورنۍ شخړې له امله وسله واله نښته رامنځ ته شوې.
د طالبانو د اعلامیې له مخې، د هغه د کورنۍ اړوند یو کس د دوی د ځواکونو له لورې نیول شوی چې د پيښې په اړه ترې پوښتنې ګرویږنې روانې دي.
خبري رسنيو ويلي، چې دا پېښه تېره شپه د کابل په کارته پروان سيمه کې رامنځته شوې ده.
د طالبانو یو شمېر منتقدینو د پېښې پړه پر طالبانو اچولې او ويلي، چې د دوی تر واک لاندې د دوی مخالفان خوندي نه دي.
خپله انجینر محمد خان د پېښې په اړه تر اوسه څه نه دي ويلي.