تاند: ( دوشنبه ، د دلوې اتلسمه) سکای نیوز ټلویزیون د هرات زندان د وضعيت په اړه راپور خپور کړی او ویلي، چې طالبانو دغه زندان د جمهوري نظام له لسګونه منسوبينو څخه ډک کړی.
د راپور له مخې، د هرات زندان په هره خونه کې تر ۴۰ پورې بنديان غځول شوي او ځينې خو تر دې هم ډېر بندیان لري.
ويل شوي، چې د هرات زندان په یوه خونق کې ۱۲ کلن ماشومان هم ساتل شوي.
سکای نیوز، چې په انحصاري ډول ېې په دې اړه د راپور جوړولو اجازه ترلاسه کړې، ادعا لري چې طالبانو په هرات زندان کې لسګونه تنه له محاکمې او دلیل پرته زنداني کړي دي.
ياد شوی راپور په هرات کې د طالبانو د والي او د هغه د ساتونکو په موجوديت کې جوړ شوی دی.
د هرات زندان لپاره د طالبانو مشر محمد نبي خلیلي ويلي، چې د طالبانو له واکمنیدو مخکې یې د دوی د یوه پټ زندان مسووليت پر غاړه و.
د هغه په وينا، هغه مهال یې خپل بندیان هره شپه له یوې سیمې بلې ته لېږدول.
د هرات زندان یو شمېر بندیانو په دې راپور کې ويلي، چې د طالبانو له واکمنیدو راهېسې له کومې محاکمې پرته بندیان دي.
د دوی په وینا، د دې زندان ډېری بندیان د پخواني جمهوري نظام منسوبين دي، نه د نیول کیدو په دلیل یې پوهیږي او نه یې د خوشې کیدو وخت معلوم دی.
د سکای نیوز خبریال وايي، چې د دې مرکې پر وخت د طالبانو د هرات زندان مشر د دوی ژباړن ته د دغو خبرو ډ نه ژباړلو وايي.
د سکای نیوز خبریال په هرات زندان کې يو ۱۲ ماشوم هم لیدلی، چې د سايکل د غلا په تور نیول شوی و.
طالبانو د سکای نیوز دغه راپور ته غبرګون نه دی ښودلی
مخکې د جمهوري نظام د ځانګړو ځواکونو د قول اردو قومندان جنرال فرید احمدي ادعا کړې وه، چې طالبان تر ۴۰ پورې پټ زندانونه لري، چې خپل منتقدین او د جمهوري نظام منسوبين پکې شکنجه کوي.
طالبانو په ټوله کې پر دوی داسې تورونه ردکړي او بې بنسټه یې ګڼلي دي.