تاند (پنجشنبه، د دلوې ۱۴مه) راپورونه وايي چې تېره شپه په بلوچستان ایالت کې د پاکستان د پوځ پر دوو مرکزونو انتحاري حملې شوې او د پاکستان پوځ ته یې درنه مرګ ژوړبله اړولې ده.

د پاکستان صدراعظم عمران خان د دغو بریدونو په غبرګون کې پوځ ستایلی چې د قربانیو په ورکولو یې د دښمن بریدونه په شا تمبولي دي.

د عمران خان په ټویټ کې د یوه پوځي د وژل کېدو یادونه شوې ده.

خو د دغه هیواد د کورنیو چارو وزارت وايي چې ۴ پوځیان او ۱۵ حمله کوونکي وژل شوي دي.

د بلوچستان د ازادۍ پوځ ډلې، چې د بلوچستان د خپلواکۍ لپاره مبارزه کوي، د دغو بریدونو مسوولیت منلی دی او ادعا یې کړې چې ۵۰ پوځیان یې وژلي دي.

تر دې څو ورځې وړاندې د بلوچ ازادۍ پوځ د وسله والو په انتحاري برید کې چې د تلاشۍ پر یوه پوسته یې وکړ د پاکستان د پوځ ۱۰ سرتېري ووژل شول.

بلوچ بېلتون پالو پخوا انتحاری بریدونه نه کول خو په افغانستان کې د طالبانو له بري وروسته، چې انتحاری بریدونو پکې ډېر رول درلود، د بلوچستان بېلتون غوښتونکو هم دې ډول بریدونو ته مخه کړې ده.

په تېرو کلونو کې د پاکستان پوځ او حکومت ادعا کوله چې د افغانستان حکومت د بلوچ بېلتون غوښتونکو او همداراز پاکستاني طالبانو ملاتړ کوي خو د افغانستان د جمهوري نظام له پرزېدو وروسته په پاکستان کې د دواړو حکومت مخالفو ډلو فعالیتونه زیات شوي دي.