تاند: ( پنجشنبه ، د دلوې څوارلسمه) د طالبانو له لوري د احصایې او معلوماتو ملي ادارې ټاکل شوي سرپرست ډاکټر محمد زیار ویلي، چې د کابل په ګډون په ۲۰ ولایتونو کې د برېښنايي پېژندپاڼو د وېش مرکزونه فعالیت کوي.
د هغه په وينا، دا مرکزونه هره ورځ له ۱۶ زرو څخه تر ۱۷ زرو پورې کسانو باندې پېژند پاڼې وېشي.
د احصایې او معلوماتو ملي ادارې طالب سرپرست نن په يوه خبري ناسته کې وويل: هویت د هر افغان حق دی او د احصایې او معلوماتو ملي اداره تل هڅه کوي چې ټول افغانان له دغه حق څخه برخمن شي.
دا په داسې حال کې ده، چې خلک د بريښنايي تذکرو د ترلاسه کولو په برخه کې له ګڼو ستونزو څخه شکایت لري.
د احصايې ملي ادارې يو شمېر تخنيکي کارکوونکو په وروستيو کې د طالبانو له لوري د دوی د ګوښه کیدو او پر ځای یې د طالبانو د اړوندو خلکو له ټاکل کیدو هم شکایت کړی.