تاند:( جمعه، د دلوې لومړۍ) راپورونه وايي، چې د کندوز ولايت د مرکزي زندان بندیانو نن ناوخته په ډله ییزه توګه له زندانه تيښته کړې او په کندوز ښار کې پوځي حالت حاکم شوی.
ځايي سرچينو رسنيو ته ويلي، چې د تښتیدلو بندیانو شمېر تر ۲۰ تنو دی.
دغه بنديان د طالبانو له واکمنیدو وروسته د مختلفو جرمونو په تور نیول شوي وو.
سرچینو ویلي، چې د کندوز د زندان بندیانو د زندان له بامونو څخه ځانونه غورځولي او فرعي کوڅو ته یې تېښته کړې ده.
عیني شاهدان وايي، چې طالبانو د بنديانو د نیولو لپاره په پرله پسې ډول ډزې کړي، چې د ښار وضعیت سره پوځي بڼه غوره کړې او خلک سخت ويريدلي.
طالبانو د کندوز د وضعيت په اړه رسنيو ته څه نه دي ويلي.