تاند (چهارشنبه، د جدې ۲۹مه) په داسې حال کې چې د طالبانو حکومت وايي، په کابل کې یې خپل هغه وسله وال نیولی چې یوه هزاره نجلۍ یې په ډزو وژلې وه، نن په خوست کې د طالبانو په هوایي ډزو یو کس وژل شوی او یو بل ټپي شوی دی.
دا هوایي ډزې طالبانو د خوست ښار په سرګردان چوک کې د ترکاري پلورونکو پر یوه لاریون وکړې.
د خوست د امنیه قوماندانۍ ویاند مستغفر ګربز وايي، وژل شوی او ټپي کس د یو مارکیټ په بام باندې د لاریون نندارې ته ولاړ وو، چې د توپک په ګولیو ولګیدل.
ده وویل، په پیل کې دواړه کسان ټپیان وو، خو وروسته یو کس د ژورو ټپونو له کبله ساه ورکړه.
د امنیه قوماندانۍ ویاند زیاتوي، د پيښې عاملان نیول شوي او د څېړنو په خاطر به عدلي او قضايي ادارو ته وروپېژندل شي.
ترکاري پلورونکو په دې اعتراض کې چې ښاروالي غواړي د دوی دوکانونه ونړوي او د ښار په بله سیمه کې ځای ورکړي.
په همدې حال کې د طالبانو د حکومت یوه ویندوی محمدنعیم نن وویل چې هغه وسله وال یې نیولی چې د زینب په نوم یوه نجلۍ یې تېره اوونۍ په دشت برچي کې هغه مهال په ډزو ووژله چې د خپلې کورنۍ له غړیو سره له یوه واده کور ته ستنېده.
د محمدنعیم په وینا د وژل شوې نجلۍ کورنۍ ته ۶ لکه افغانۍ تاوان ورکړل شوی دی.
طالب امنیت ساتونکو په تېرو کابو ۵ میاشتو کې په ځلونو په ډزو کسان وژلي دي او په ځینو مواردو کې یې خپله سهوه منلې هم ده.