تاند:( چار شنبه، د جدي نهه ویشتمه) اروپايي ټولنه اعلان کړی، چې د ښوونې، روغتیا او د معیشیت د خوندیتوب په برخه کې به له افغانستان سره د څه باندې ۲۶۸ میلیونه یورو، چې شاوخوا ۳ سوه میلیونه ډالره کیږي، مرسته کوي.
د دغې ټولنې چارواکو ويلي، چې دا مرستې به د ملګرو ملتونو د هغو موسسو له لارې ورکړي چې په دغه هېواد کې فعالیت لري.
طالبانو د دې مرستې په اړه کوم غبرګون نه دی ښودلی.
دا مرسته په داسې مهال اعلانیږي، چې طالب چارواکو نن په لومړي ځل د افغانستان د اقتصاد په اړه یو کنفرانس جوړ کړی و او له نړیوالې ټولنې څخه یې د دوی حکومت سره د مرستو د نه ترسره کولو له امله شکایت وکړ.
د طالبانو د واکمنۍ په درېيمه مياشت نړيوالو اقتصادي بنسټونو وویل، چې د جمهوري نظام له سقوط سره د افغانستان اقتصاد ۳۰ سلنه سقوط شوی او دا لړۍ نوره هم دوام لري.
د يادونې وړ ده، چې ملګرو ملتونو په افغانستان کې د طالبانو له واکمنیدو سره د ۲۴ میلیونه وګړو د فقر خبر هم ورکړی.