تاند:( يکشنبه، د جدي شپږ ویشتمه) په کندوز کې د طالبانو مستوفي ملا محمد نسیم وايي، چې په تېرو ۴ مياشتو کې د دې ولايت له مختلفو ادارو څخه تر ۵۶۰ ميليونه افغانيو پورې عوايد تر لاسه شوي دي.
ملا نسيم دا هم ويلي، چې د مخکيني نظام د څلورو مياشتو په نسبت د کندوز عوايد ۸۰ سلنه زيات شوي دي.
د کندوز د مستوفي په وينا: د کرنې، معادن، عدلیې ریاست او نورو ادارو څخه دغه عوايد ترلاسه شوي دي.
د افغانستان له نورو سيمو څخه هم طالبانو د عوایدو د زیاتوالي خبر ورکړی او ویلي، چې له شل کلن ځنډ وروسته افغانستان له داخلي عوايدو څخه د خپلې بوديجې په تمویلولو توانیدلی.
له دې سره، د دولتي ادارو کارکوونکي وايي چې په مياشتو- مياشتو معاشونه نه ورکول کيږي، امتیازات او ډوډۍ پرې بنده شوې او حکومتولي سخته ټکنۍ شوې ده.
د افغانستان د جمهوري نظام د لګښتونو تر ټولو لویه برخه په جګړې متمرکزه وه.