تاند(سې شنبه، دجدي ۲۱ مه) د امریکا د متحدو ایالتونو د نړیوالې پراختیا ادارې د سې شنبې په ورځ افغانستان ته د ۳۰۰ ملیون ډالرو په ارزښت د بشري مرستې اعلان وکړ.
د فاکس نیوز د راپور له مخې، له دې سره د ۲۰۲۱ کال د اکتوبر له میاشتې را په دې خوا افغانستان ته د امریکا د حکومت مرستې نژدې ۷۸۲ ملیون ډالرو ته رسېږي.
د سپینې ماڼۍ د ملي امنیت شورا ویندویې ایمیلي هورن په یوه بیان کې وویل: «د امریکا متحد ایالتونه د افغانانو ملاتړ ته ژمن دي او موږ پر خپلو ټولو هغو انتخابانو غور کوو چې راسره شته. موږ د افغانستان د خلکو ترڅنګ ولاړ یوو.»
د فاکس نیوز پر اساس، افغانستان ته دا نوې مرسته په داسې وخت کې اعلان شوې چې دا هیواد د طالبانو له واک ته رسېدو وروسته له سختې او بې ساري اقتصادي تنګسې، لوږې او مالي بحران سره مخامخ شوی دی.
ټاکل شوې ده چې د امریکا له لوري په ۳۰۰ ملیون اعلان شویو پیسو افغانانو ته خوراکي مواد، سرپناه او روغتیايي خدمات برابر شي.