تاند: ( پنجشنبه، د جدي شپاړسمه) د فراه په بکواه ولسوالۍ کې د طالبانو هوايي ځواک د دوو کورنيو ۱۲ غړي، چې سېلابونو ايسار کړي وو، ژغورلي دي.
په فراه کې د طالبانو د امنيه قوماندانۍ وياند عارف عدیل ويلي، چې دغه سېلاب ځپلي کسان یې فراه ښار ته لېږدولي دي.
سرچینې ویلي، چې د دغو سېلاب ځپلو کسانو کورونه نړیدلي او په فراه کې د طالبانو ځايي چارواکو ورسره نقدي مرسته کړې ده.
سرچينې د فراه په بکواه کې د سېلابونو له کبله د نړيدلو کورونو شمېر نه دی په ډاګه کړی، خو ویلي چې د ځاني زيان راپور ورڅخه نه دی ترلاسه شوی.
چارواکو دا هم ویلي، چې مرستندويه ادارو په فراه کې له سېلاب ځپلو سره د مرستو لړۍ پيل کړې ده.
څو ورځې مخکې په کندهار کې هم د طالبانو هوايي ځواک یو شمېر سېلاب ځپلي کسان ژغورلي وو.