تاند: ( سې شنبه، د جدي څوارلسمه) طالبان وايي، چې د اسلامي امارت د کابینې غونډه يې د رئیس الوزراء ملا محمد حسن آخند په مشرۍ، د ریاسة الوزراء د درې واړو مرستیالانو او وزیرانو په ګډون ترسره شوه.
د طالبانو د اعلامیې له مخې، په دې غونډه کې د طالبانو د عمومي مشر ( چې دوی یې امیرالمؤمنین ګڼي) د هغه حکم د عملي کیدو په لړ کې د محابسو او توقیف خانو د تفتیش لپاره د سترې محکمې د مرستیال شیخ عبدالمالک په مشرۍ لوړرتبه هیئت وټاکل شو، تر څو ټول بندیان مخامخ وویني او که څوک بې ګناه بندي شوی وي، د خلاصون عاجله پریکړه یې وکړي.
خبر پاڼه زیاتوي، چې د طالبانو کابینې پریکړه وکړه څو د کابل ختیځ پل چرخي سیمه کې د کابل ښاروالۍ د ۱۶ ګودامونو له جملې دې لس ګودامونه د روغتیا وزارت ته وسپارل شي، تر څو د معتادینو د معالجې لپاره مجهز طبي کمپلکس په کې جوړ او د معتادینو د اوږدمهالې روزنې او له اعتیاده د خلاصون لپاره ترې کار واخیستل شي.
د طالبانو کابینې کړی، چې له هیواده د هر ډول اوسپنو او کباړ ایستل په مطلق ډول بند دي.
طالبان وايي، چې يوه اقتصادي هیئت ته دنده وسپارل شوه، چې د بدخشان د شورابک بند موضوع، د کانونو په قراردادونو کې د پروسس او ځینو کانونو د سهامي کولو موضوع هم وڅيړي او پایله یې د کابینې مجلس ته وړاندې کړي.
د طالبانو اعلاميه زياتوي: د کابینې مجلس لخوا د معارف، شهرسازۍ او اداره امور ګډ هیئت ته دنده وسپازل شوه چې د معارف وزارت د اسلامي تعلیماتو د معینیت لپاره مناسب ځای تعین کړي، تر څو د دې ادارې ټولې اړتیاوې په کې ترسره او خپلې چارې په سم ډول پر مخ یوسي.