تاند: ( سې شنبه، د جدي څوارلسمه) د کابل په بګراميو ولسوالۍ کې د طالبانو د اوبو او برېښنا وزارت سرپرست مولوي عبدالطیف منصور د بریښنا یو برج پرانيستی.
د طالبانو په يوه اعلاميه کې راغلي، چې د ۴۰۰ کيلو ولټ امپیره ظرفيت لرونکی دغه برج به د ګوسفند درې په نوم سیمه کې یو نیم سل کورونو او يوې مدرسې ته د بریښنا اسانتيا برابره کړي.
د طالبانو ياد شوي وزير له ديني عالمانو غوښتي، چې خلک د بیت المال او بریښنایي توکیو په امنيت ساتلو کې مرستې ته وهڅوي.
په وروستيو ورځو کې طالبان د بريښنا او اوبو مدیریت برخې ته د ډېرې توجه خبره کوي.
د طالبانو حکومت په تېره لږه موده کې له ازبکستان او تاجيکستان سره د وارداتي برېښنا د را لېږدولو د تړونونو د تمديد خبر هم ورکړی دی.