تاند:( شنبه، د جدي څلورمه) د طالبانو د لیکو د تصفيې د کميسيون مشر او د دفاع وزارت سر مفتش مفتي لطف الله حکیمي وايي، چې د واکمنۍ په لومړیو ورځو کې یې د داعش يو غړی د دفاع وزارت د يوې برخې عمومي رییس ټاکل شوی و.
نوموړي دا خبره له شمشاد ټلويزيون سره د يوه يوې مرکې پر مهال وکړه، خو د دغه کس نوم او نور جزییات یې وړاندې نه کړل.
د مفتي حکيمي په وينا، چې د هغه کس په اړه خپله دی شکمن شوی او خپل دا شک يې د طالبانو د دفاع وزیر مولوي محمد یعقوب مجاهد سره شريک کړی و.
د طالبانو د ليکو د تصفيې کميسيون مشر وايي، چې ملا یعقوب ورته د دغه شک په اړه د پلټنو وويل، چې د پلټنو په ترڅ کې يې شک ريښتيا ثابت شو.
حکيمي په دې مرکه کې دا هم وويل، چې د دغه کس نوم نه اخلي، ټول یې پېژني.
معلومه نه ده، چې دا مشهور کس څوک او د دفاع وزارت د کومې برخې عمومي رییس ټاکل شوی و.
حکيمي په دې مرکه کې ټينګار وکړ، چې تر مشرۍ لاندې کميسيون به یې د طالبانو لیکې له ناوړه خلکو په ښه توګه پاکوي او په دې برخه کې خلک بايد مرسته ورسره وکړي.
پرون د طالبانو د ليکو د تصفيې کميسيون وویل، چې څه باندې ۱۸ سوه تنه یې د خپلو یو شمېر ولایتي رييسانو او د مخکيني حکومت د يو شمېر چارواکو په ګډون له خپلو لیکو تصفيه کړي او يو شمېر خلک، چې باید تصفيه شوي وای، خپله د دوی له لیکو وتلي.
ياد شوي کمېسيون يو شمېر تصفيه شويو کسانو ته د دوسيو د برابرولو او محکمو ته يې د دوسيو د سپارلو خبر هم ورکړی.
فکر نکړم چې يو سوک د دومره کم عقل شي چه د داعش غړ يتوب د ولري او ياد کومک ورته برابر کړي حکه چه شرعي توجه نشته. ممکن دا ريس چه د داعش تورن شوي سلفي فکره وي چه اوس سلفيان د داعش په رنګ رنګ شوي. والله اعلم.