تاند:( شنبه، د جدي څلورمه) پاکستان ایکسپریس ټريبيون ورځپاڼې خبر ورکړی، چې پاکستان او طالب چارواکو په لوړه کچه د ډیورنډ کرښې د اغزن تار په اړه پټه هوکړه کړې.

وی شوي، چې دا هوکړه د طالبانو له لوري د دغه تار له شلولو وروسته شوې.

ایکسپریس ټريبيون زیاتوي، چې د ننګرهار په لعلپورې ولسوالۍ کې د اغزن سيم له شلول کیدو وروسته، د طالبانو د دفاع وزیر مولوي محمد یعقوب مجاهد سیمې ته ورغلی.

د ورځپاڼې په حواله، هغه ځايي طالب چارواکو ته امر کړی، چې له دا ډول پارونکو اقداماتو څخه نوره ډډه وکړي.

ويل شوي، چې طالب چارواکو پاکستان ته د ننګرهار د استخباراتو د رييس ډاکټر بشیر له لوري د اغزن سيم شلول د هغه شخصي اقدام ګڼلی او په راتلونکي کې يې د داسې اقدام د نه ترسره کیدو ډاډ ورکړی.

پاکستاني ورځپاڼې نه دي ويلي، چې د پاکستاني چارواکو او طالبانو نوې هوکړه څه ډول ده او د دواړو لوريو کومو چارواکو کړې ده؟

نيږدې يوه اونۍ مخکې په ننګرهار کې د طالبانو د استخباراتو رييس ډاکټر بشیر په لعلپورې ولسوالۍ کې د پاکستان له لوري پر ډيورنډ کرښې د لګول شوي اغزن سيم د شلولو او پاکستاني لوري ته د ګواښونو ویډیو خپره کړه.

د طالبانو وياندويانو په دې اړه رسنيو ته څه ونه ويل.

وروسته د دوی لوی درستیز او په ننګرهار کې سیمه ییز چارواکي هم لعلپورې ته لاړل او ان د پاکستان پر وړاندې یې د خپلو ځواکونو د تیارسئ خبر ورکړ.

طالبانو د ایکسپریس ټريبيون د تازه راپور په اړه غبرګون نه دی ښودلی.