تاند:( چار شنبه، د جدي لومړۍ) د پاکستان په پلازمېنه اسلام آباد کې د لال جومات او مدرسې مشر مولانا عبدالعزیز د طالبانو اسلامي امارت ته په یوه لیک کې پر طالبانو نیوکه او د دوی د بهرنيو چارو وزير مولوي امیر خان متقي څخه ګیله کړې ده.
هغه ويلي، چې طالبان د پاکستان حکومت سره ښې اړیکې پالي خو پاکستاني مدرسې او مجاهدین چې د امریکا او ناټو د اشغال په مقابل کې یې ددوي ملاتړ کړی
و هیر کړي دي.
مولانا عبدالعزیز وایي چې د طالبانو د بهرنیو چارو وزیر امیر خان متقي د مولانا فضل الرحمن سره تر لیدو وروسته کولای شویعل، چې جامعه حفصه، لال مسجد او جامعه فریدیه ته ورشي، خپله خواخوږي ورسره شریکه کړي او پر هغوی د لګول شویو بندیزونو په اړه خبرې وکړي او د هغوی ستونزې واوري.
طالبانو او د بهرنيو چارو وزير یې مولوي امیر خان متقي، چې ممکن پاکستان کې د ديني زده کړو پر وخت د مولانا عبدالعزیز شاګرد هم پاتې شوی وي، په دې اړه کوم غبرګون نه دی ښودلی.
واک ته له رسېدو او په افغانستان کې د حکومت تر اعلانولو وروسته، په لنډه موده کې د طالبانو ډېر لوړپوړي مشران پاکستان ته په سفر ځي، چې له هغې ډلې د دوی د لوړو زده کړو وزير عبدالباقي حقاني له نيږدې يوې مياشتې راهيسې په پاکستان کې دی.
عبدالباقي حقاني د خپل روزنتون ( حقانيه مدرسې) په ګډون د پاکستان مختلفو مدرسو او د طالبانو په معنوي پلار مشهور ديني عالم مولانا فضل الرحمن ته د ملاقات لپاره ورغلی.
د طالبانو د عامې روغتيا وزير ډاکټر عباد هم څه موده مخکې پاکستان ته د سفر پر مهال د کراچۍ ښار له هغې مدرسې لیدنه کړې وه، چې ده پکې زده کړې کړی وې.