تاند:( چار شنبه، د جدي لومړۍ) رویټرز خبري اژانس په یوه راپور کې افشا کړې، چې ملګرو ملتونو له طالبانو سره د خپل یو کلن امنیت د تامین لپاره، د طالبانو حکومت ته د ۶ میلیونه امریکایي ډالرو د ورکړې توافق کړی.
د ملګرو ملتونو سرچینو دغه خبري اژانس ته یاده موضوع تایید کړې او ویلي، چې په نا امنه سیمو کې د خپل امنیت د تامین په خاطر دغه کار کوي.
یو شمېر نړیوالو څېړونکو بیا رویټرز ته ویلي، چې د ملګرو ملتونو او امریکا متحده ایالاتو د بندیزونو په تور نوملړ کې د شاملو طالب مشرانو ادارې ته پیسې ورکول، هغه هم د ملګرو ملتونو له لوري د پوښتنې وړ موضوع او د دغه نړیوال سازمان د اصولو خلاف دي.
طالبانو په دې اړه خپل نظر نه دی څرګند کړی.
ویل شوي، چې د یوه غیر رسمي حکومت لپاره، چې نړیوالو یې مشروعیت نه دی تایید کړی، د ملګرو ملتونو دا ډول تعامل دا پوښتنه ولاړوي، چې آیا د پردې شاته دا نړیوال سازمان خو به د طالبانو د په رسمیت پېژندلو هدف نه لري؟
د ملګرو ملتونو ځينو سرچینو بیا دا موضوع رد کړې او ویلي، چې امنیتي موضوع د طالبانو له رسمیت پېژندلو سره کوم اړخ نه لګوي.
ملګرو ملتونو له دې مخکې ویلي و، چې افغانستان ته یې د هر ډول مرستو د لېږد اساسي هدف د افغانستان د بشري او اقتصادي ناورین مقابله او د افغانستان د اقتصاد د پاشل کیدو د مخنیوي هڅه ده.
طالبان، چې له نړیوالې ټولنې څخه د دوی د حکومت د په رسمیت پېژندلو څخه نهیلي شوي ښکاري، په وروستیو کې د رسمیت پېژندلو پرځای دوی سره پر «تعامل» ډېر ټینګار لري او نړۍ نه دوی سره تعامل غواړي.
د نړیوالو بندیزونو کمېټه، چې طالب مشران یې هم په لیست کې دي، ټینګار کوي چې نه باید افغانستان سره کیدونکې مرستې د طالبانو د پياوړي کیدو سبب شي.
امریکایي پوځ هم د نه خملې په بدل کې پیسي ورکولې!