تاند:( سې شنبه ، د قوس درويشتمه) د فراه د صرافانو ټولنې تايید کړه، چې په دې ولايت کې يوه صراف د ډالرو د بیې له لوړیدو سره سکته کړې ده.
د دغه صراف د سکتې خبر پرون خپور شوی و.
د فراه ولايت د صرافانو د ټولنې مشر شېر احمد منلې، چې دا خبر واقعيت لري.
د هغه په وينا، دغه صراف غلام نومیده.
د سرچينې د معلوماتو له مخې، دغه صراف په ډالرو ډېر پوروړی و، چې د بیې له لوړیدو سره یې مغزي سکته کړې ده.
پرون د افغانستان په بازارونو کې د يوه ډالر بیه تر ۱۳۰ افغانيو ورسيده.
د ډالرو د بیې لوړېدو په افغانستان کې د داسې زيانونو تر څنګ د خوراکي او نورو توکيو بيې هم په بېساري ډول لورې کړي، چې د بشري ناورين شدت او له دې کبله د انساني فاجعې خطر نور هم ورسره زيات شوی دی.
نن د طالبانو د رييس الوزرا يوه مرستيال مولوي عبدالسلام حنفي په يوه خبري ناسته کې وويل، چې نور له افغانيو پرته په نورو پيسو راکړه ورکړه منع ده.
هغه زياته کړه: د صرافانو لپاره نوې تګلاره جوړېږي او له دې وروسته هر صراف چې د اسعارو په برخه کې د قاچاق په تړاو ونیول شي هغوی ته به سزا ورکړل شي او هغوی ملي خاینان دي.