تاند:( يکشنبه، د قوس څوارلسمه) په افغانستان کې د ملګرو ملتونو د سرمنشي ځانګړې استازې او د يوناما دفتر مشره دبرا لاینز، د افغانستان په اړه د خبرو لپاره د ایران پلازمېنې تهران ته په سفر تللې ده.
ويل شوي، چې نوموړې سره يو پلاوی هم ملګری دی.
یاد شوی پلاوی به له ایراني چارواکو سره د افغانستان د وضعیت په اړه خبرې اترې وکړي.
پلاوي نن د ايران د بهرنيو چارو وزارت له مرستيال عباس عراقچي سره لیدلي.
ايراني رسنيو او دغه راز يوناما د دغې ليدنې په اړه ډېر جزییات نه دي ورکړي.
د افغانستان موضوع د طالبانو له واکمنیدو سره، د سیمې او نړۍ د هېوادونو په يوه مهم بحث بدله شوې ده.
دلته شديد اقتصادي او بشري ناورين، بې کاري، د نړیوال تروریزم د بيا پیاوړتیا وېره او د ښځو او بشري حقونو نقض د سیمې او نړۍ له لويو انديښنو څخه دي، چې د حل لپاره یې ډېری بهرني ديپلوماتان او د نړیوالو سازمانونو مسوولین په خبرو اترو اخته دي.