تاند:( دوشنبه، د عقرب څلور ویشتمه)د افغانستان لپاره د ایران ځانګړي استازي حسن کاظمي قمي نن کابل ته د سفر پر مهال یو ځل بیا امریکا متحده ایالات تورن کړل، چې په افغانستان کې د داعش ډلې د فعالیتونو ملاتړ کوي.
نوموړي په کابل کې له خبریالانو سره د خبرو پر وخت وویل، چې ځینې نور هېوادونه هم له ترهګرۍ سره د مبارزې په نامه غواړي په افغانستان کې نیابتي جګړه ولري.
ایراني استازي د نورو هېوادونو نومونه وانخیستل، چې دغه هېوادونه کوم دي؟
د ایران استازي دغه راز هیله مندي وښوده، چې په افغانستان کې د ځواکمن او ټول شموله حکومت له جوړیدو سره به د سولې او ثبات لپاره کار وشي او بهرنۍ دسیسې به ناکامه شي.
ایراني استازي د خپل سفر یوه موخه هم پر ټول شموله حکومت جوړیدو له طالب مشرانو سره خبرې ښودلي.
مخکې د ایران مذهبي رهبر آیت الله خامنه یي هم امریکا تورنه کړې وه، چې په افغانستان کې د داعش ډلې د فعالیتونو ملاتړ کوي.
طالبان بيا په افغانستان کې د داعش ډلې فعالیتونه ردوي او د خطر په توګه يې نه مني.
دا په داسې حال کې ده، چې نن طالبانو په کندهار ولایت کې د داعش ډلې خلاف د عملياتو د پيل اعلان کړی دی.
طالبانو او امريکا متحده ايالاتو د ايران د تازه ادعا په اړه کوم غبرګون نه دی ښودلی.