تاند:( سې شنبه، د عقرب اتلسمه) د افغانستان د سولې لپاره د امريکا متحده ايالاتو د بهرنيو چارو وزارت مستعفي شوي ځانګړي استازي زلمي خليلزاد تاييد کړه، چې د طالبانو ترمنځ خپلمنځي اختلافات موجود دي.
هغه له طلوع نيوز سره په یوه تازه مرکه کې دا هم وويل، چې دا اختلافات طبيعي او تر ډېره د طالبانو د حکومتولۍ د بڼې او پکې د نورو سياسي لوريو د حضور د څرنګوالي په اړه دي.
زلمي خليلزاد د حقاني شبکې او ملا برادر ډلې د اختلافاتو په اړه د څو مسلسلو پوښتنو په ځواب کې په ضمني توګه دا اختلافات تاييد کړل.
هغه په ورته وخت کې د ملا برادر په اړه مثبت نظر څرګند او په دې توګه ترې ملاتړ وکړ.
د خليلزاد په وينا، برادر وطن دوسته او د شرايطو په درک کولو حاکم مشر دی.
زلمي خليلزاد په مسلسله توګه د ملا برادر نوم د افغانستان د يوه مشر په توګه ياد او په دې ډول ورته خپل ارادت وښوده.
په وروستيو کې د حقاني شبکې او ملا برادر ډلې تر منځ د خپلمنځیو اختلافونو موضوع ډېره رسنيزه شوې ده.
ويل کيږي، چې دا اختلافات تر ډېره د واک د وېش په سر دي.
د طالبانو وياندويانو بيا د دوی په ليکو کې د اختلافاتو موجوديت رد کړی دی.