تاند:( سې شنبه، د ليندۍ څلورمه) د ملګرو ملتونو سرمنشي آنتونیو گوترش په افغانستان کې د بشري ناورين پراختيا ته په اشارې سره، خبرداری ورکړی چې دا هېواد د نړۍ په تر ټولو ستر ناورين بدلیدونکی دی.
هغه پر نړۍ غږ وکړ، چې د افغانستان د بشري فاجعې د مخنيوي لپاره دغه هېواد ته په عاجل ډول بشرپاله مرستې واستوي.
د نړيوال سرمنشي په خبره، د ژمي له پیل څخه مخکې باید افغانستان ته دا مرستې ورسيږي او د زيانمنو کورنيو عاجل لاسنیوی وشي.
نړيوال بنسټونه په يوبل پسې ګواښ کوي، چې که افغانستان ته په ډېر عاجل ډول بشري مرستې ونه ليږل شي، د له منځه تللې حکومتولۍ او ميليونونه کسانو د وزګارۍ له کبله چې دليل یې پر افغانستان د طالبانو واکمنيدل دي، سمدستي ۳ ميليونه ماشومان له لوږې مري.
د طالبانو د واکمنۍ تر څنګ وچکالي او د کرونا ويروس له کبله په نړيواله کچه ډېر شوي اقتصادي مشکلات لازمو خوړو ته د افغانانو د لاسرسي پر وړاندې د خنډ جوړیدو عمده دليلونه دي.
طالبانو د نړيوالو پرله پسې دغو خبرداريو ته غبرګون نه دی ښودلی.
څو ورځې مخکې د کابل ښار په لويديځ کې د سختې لوږې له کبله د يوې کورنۍ اتو ماشومانو د مړينې خبر ورکړل شو.
د افغانستان يوه مطرح هزاره سياستوال محمد محقق ياده پېښه طالبانو ته شرمونکې وګڼله او دوی یې د خلکو ژوند او امنيت ته په نه پاملرنې تورن کړل.
طالبانو د دې او د ځانوژنې د هغو پېښو په اړه، چې دليل يې فقر ګڼل کېږي، څه نه دي ويلي.