تاند:( جمعه، د ميزان در ویشتمه) د پاکستان د نيشل عوامي پارټۍ مشر اسفنديار ولي خان په کندهار کې د شيعه ګانو پر یوه جومات د نن ورځې ترهګريز بريد غندلی
هغه په دې اړه پخپل پيغام کې ويلي: په قندهار کې د جومات دننه بريد او بې ګناه انسانان وژل څوک هم جايز نه شي بللی۔موږ دا پېښه په سختو ټکو غندو۔
اسفنديار ولي خان زياته کړې، چې عوامي نېشنل پارټي د نړۍ په هر ګوټ کې د ترهه ګرۍ غندنه کوي۔
نوموړي تېره اونۍ په کندوز کې هم د شيعه ګانو پر یوه جومات د ورته ترهګريز بريد غندنه کړې وه او خبرداری یې ورکړی و، چې د داسې پېښو لمنه به محدوده پاتې نه شي او سيمې ته به وغځيږي.
د اسفنديار ولي خان اشاره په ډېر ګومان پاکستان ته وه، ځکه په سيمه کې د ترهګرۍ د تولید، تمويل او رهبرۍ اساسي عامل ګڼل کېږي.
د کندوز د تېرې اونۍ پېښې مسووليت داعش ډلې پر غاړه اخيستی و، خو د کندهار د نننۍ پېښې مسووليت لا چا په غاړه نه دی اخیستی .
د کندهار نننۍ پېښه د طالبانو د رژيم تر څنګ ملګرو ملتونو سازمان، پخواني ولسمشر حامد کرزي، ډاکټر عمر زاخېلوال، رحمت الله نبیل او ګڼو نورو افغان سياسي څېرو غندلې ده.