تاند:( جمعه، د ميزان در ویشتمه) د پښتونخوا د عوامي ملي پارټۍ مشر محمود خان اڅکزي له طالبانو او په خاص ډول د دوی له یوه منځلاري مشر ملا برادر څخه غوښتي، چې د افغانستان د قضيې د حل لپاره په عاجل ډول لویه جرګه جوړه کړي.
اڅکزي دغه راز ويلي، چې لویه جرګه دې په افغانستان کې د ټولو لوریو په ګډون د یوه پراخ بنسټه نظام جوړیدو ته زمینه برابره کړي.
نوموړي خبرداری ورکړی، چې لویدیځ او په ټوله کې بهرنیان د خپلو موخو لپاره په افغانستان کې د جګړې دوام غواړي او نه بايد د دې غوښتنې د عملي کیدو لپاره فرصتونه په لاس ورکړل شي.
اڅکزي همدا شان له طالبانو غوښتي، چې ملي بیرغ ته درناوی وکړي او د خپل تنظيمي بیرغ تر څنګ ترې د هېواد د ملي بیرغ په توګه ګټه واخلي.
طالبانو په دې اړه کوم غبرګون نه دی ښودلی.
دوی نه ورته غوښتنې ډېرې شوي، خو طالبانو لا ټول ګډونه نظام جوړیدو او د واک د ټاکلو د سرچینو په اړه وضاحت نه دی ورکړی.
پرون د ترکیې د بهرنیو چارو وزیر چاوش داود اوغلو هم په بيا ځلي ډول ترکيې ته د طالبانو بللی لوړ پوړی پلاوی وهڅاوه، چې هم ښځينه وو ته د کار او زده کړو تلف کړی حق بيا ورکړي او هم د ټول ګډونه نظام جوړیدو ته غاړه کېږدي.