تاند(یکشنبه، د میزان ۲۸مه) د الجزیرې تلویزیون د راپور له مخې، د طالبانو پلاوي په دوحه کې له امریکايي پلاوي سره خپلې خبرې ګټورې وبللې.
الجزیرې د طالبانو د اطلاعاتو او کلتور د سرپرست وزیر په قول ویلي چې د دوی موقت حکومت هیله لري چې دا غونډه به د امریکا له لوري د طالبانو د حکومت د رسمیت پېژندلو لور ته یو ګام وي.
دا له کله چې د اګست په پای کې امریکا له افغانستانه خپل ځواکونه په بشپړ ډول ایستلي، د امریکا او طالبانو ترمنځ لومړنۍ خبرې دي.
د طالبانو پلاوي تمه لرله چې نن / یکشنبه په دوحه کې د اروپايي اتحادیې له پلاوي سره هم وویني.
د امریکا او طالبانو ترمنځ په اړیکو کې ښه والی د افغانستان پر عمومي وضعیت په تېره بیا اقتصاد ژور اغېز لرلی شي.
که امریکا حاضره شي چې د طالبانو حکومت په رسمیت وپېژني، هیڅ هیواد به پاتې نه شي چې د طالبانو حکومت په رسمیت ونه پېژني او له بلې خوا به پر افغانستان اقتصادي بندیزونه پای ته ورسېږي.
خو د چارو شنونکي وايي، امریکا او اروپايي ټولنه ښايي تر هغو د طالبانو حکومت په رسمیت ونه پېژندلی شي چې طالبانو د ښځو د تعلیم او کار په شمول په بېلابېلو برخو کې له نرمښته کار نه وي اخیستی.