تاند:( شنبه، د ميزان اوولسمه) ‏د امريکا د بهرنيو چارو وزارت مرستیاله وندي شرمن وايي، چې هېواد به يې په سمدستي توګه د طالبانو د حکومت د رسميت پېژندلو لپاره کوم ګام وانخلي.

نوموړې دا خبره پرون ناوخته د پاکستان په پلازمېنه اسلام اباد کې د يوې خبري ناستې په ترڅ کې وکړه.

مېرمن شرمن وويل، چې هېواد يې سمدستي په افغانستان کې د بشري ناورين د حل لپاره پر عاجلو او ممکنه اقداماتو تمرکز کوي.

هغې د طالبانو د په رسميت پېژندلو لپاره د متحده ايالاتو د مخکينيو شرطونو يادونه وکړه او ټينګار يې وکړ، چې د هغو شرطونو له پوره کولو پرته به طالبانو سره د متحده ايالاتو د ديپلوماتيکو اړيکو پیل ممکن نه وي.

د بشري حقونو درناوي ته عملي ژمنتيا، د ښځو په ګډون ټول شموله حکومت جوړول او داسې نور د طالبانو د حکومت پېژندلو لپاره د متحده ايالاتو اساسي شرطونه دي.

طالبانو د متحده ايالاتو په غبرګون کې ويلي، چې افغانان دې د خپلو کورنيو چارو په تړاو خپلواکو پريکړو ته پريږدي.

دغې لوړپوړې امريکايي ديپلوماتې په تازه څرګندونو کې د خوړو د نړيوال سازمان د تازه راپور يادونه هم وکړه، چې د افغانستان په اړه تازه خپور شوی دی.

په راپور کې ويل شوي، چې يو ميليون افغان ماشومان به عاجل ډول د لوږې له کبله د مرګ ګواښ سره مخامخ دي او ۱۸ ميليونه نور بېړنيو مرستو ته اړتيا لري.

د مېرمن شرمن څرګندونې او د افغانستان په اړه پاکستاني چارواکو سره خبرې په داسې مهال دي، چې د طالبانو د بهرنيو چارو وزارت د سرپرست امير خان متقي په مشرۍ د دوی يو پلاوی پرون قطر ته تللی څو د قطر او يو شمېر نورو هېوادونو له استازو سره وويني.

ويل کيږي، چې د طالب پلاوي له ورتلو سره هم مهاله، د متحده ايالاتو يو پلاوی هم قطر ته روان شوی او ممکن طالب لوري سره وويني.